Hazin Ludhianvi
phuul ka paigham le jaa.e koi maali ke naam
us sarapa fasl-e-gul gulzar ke vaali ka naam
main bahadur-shah-e-‘zafar’ aur dard ka rangun hai
kya likhun ‘ghalib’ ke naam aur kya likhun ‘hali’ ke naam
sabza-e-begana ho ya lala-o-gul ki qaba
vaqf hai mera lahu gulshan ki hariyali ke naam
likh raha huun apne hathon ki ḳharashon ka salam
yaar ke dast-e-hina.i ki hasin laali ke naam
ai nadim-e-mah-o-anjum aa koi paigham de
pastiyon men Dagmagati be-par-o-bali ke naam
asl men sail-e-ḳhizan laata hai paigham-e-bahar
har shagufa har kali har paat har Daali ke naam
tera divana ‘hazin’ mansub karta hai ba-shauq
ye ghazal ai ishq teri fitrat-e-ali ke naam
Leave a Reply