miri tum se shanasai bahut hai
magar ehsas-e-tanhai bahut hai
bikhar ja.un to ḳhud hi hai simaTna
ki ye duniya tamashai bahut hai
mujhe gharqab ho jaane ka hai dar
sarab-e-dasht dariyai bahut hai
chalo ab sach bhi kah kar dekhte hain
yahan shor-e-pazirai bahut hai
nahin vus.at tire dariya-e-dil men
magar ankhon men gahrai bahut hai
yahan se kuuch karna hi paḌega
tire kuche men rusvai bahut hai
‘asad’ mushkil se ghabrata nahin huun
dimagh-o-dil men yaktai bahut hai
Leave a Reply