Arsh Siddiqui
vo jo ab dil ki rahguzar men nahin
vaqt kahta hai main safar men nahin
meri divangi bhi ḳhatm hui
tere jalve bhi ab nazar men nahin
kya gham-e-yar kya ḳhayal-e-bahar
aaj sauda bhi koi sar men nahin
ham sa kya hoga koi be-saman
haa.e nam-e-ḳhuda bhi ghar men nahin
vaj.h-e-rusva.i hai yahan har baat
aib men kya hai jo hunar men nahin
main huun tere jamal se sozan
apna kuchh tabish-e-qamar men nahin
ek divar-e-tirgi ke siva
koi manzar bhi ‘arsh’ dar men nahin
Leave a Reply