Bahrupni

Kaifi Azmi

ek gardan pe saikdon chehre

aur har chehre par hazaron daagh

aur har daagh band darvaza

raushni in se aa nahin sakti

raushni in se ja nahin sakti

tang siina hai hauz masjid ka

dil vo duuna pujariyon ke baad

chatte rahte hain jise kutte

kutte duuna jo chaat lete hain

devtaon ko kaat lete hain

jaane kis kokh ne jana is ko

jaane kis sehn men javan hui

jaane kis des se chali kam-bakht

vaise ye har zaban bolti hai

zakhm khidki ki tarah kholti hai

aur kahti hai jhank kar dil men

tera mazhab, tira aziim khuda

teri tahzib ke hasin sanam

sab ko khatre ne aaj ghera hai

baad un ke jahan andhera hai

sard ho jaata hai lahu mera

band ho jaati hain khuli ankhen

aisa lagta hai jaise duniya men

sabhi dushman hain koi dost nahin

mujh ko zinda nigal rahi hai zamin

aisa lagta hai rakshas koi

ek gagar kamar men latka kar

asman par chadhega akhir-e-shab

nuur saara nichod laega

mere taare bhi tod laega

ye jo dharti ka phat gaya siina

aur bahar nikal pade hain julus

mujh se kahte hain tum hamare ho

main agar in ka huun to main kya huun

main kisi ka nahin huun apna huun

mujh ko tanhai ne diya hai janam

mera sab kuchh akele-pan se hai

kaun puchhega mujh ko mele men

saath jis din qadam badhaunga

chaal main apni bhuul jaunga

ye aur aise hi chand aur saval

dhundne par bhi aaj tak mujh ko

jin ke maan baap ka mila na suragh

zehn men ye undel deti hai

mujh ko mutthi men bhench leti hai

chahta huun ki qatl kar duun ise

vaar lekin jab is pe karta huun

mere siine pe zakhm ubharte hain

mere mathe se khuun tapakta hai

jaane kya mera is ka rishta hai

andhiyon men azaan di main ne

sankh phunka andheri raton men

ghar ke bahar salib latkai

ek ik dar se us ko thukraya

shahr se duur ja ke phenk aaya

aur elaan kar diya ki utho

barf si jam gai hai sinon men

garm boson se us ko pighla do

kar lo jo bhi gunah vo kam hai

aaj ki raat jashn-e-adam hai

ye miri astin se nikli

rakh diya daud ke charagh pe haath

mal diya phir andhera chehre par

hont se dil ki baat laut gai

dar tak aa ke barat laut gai

us ne mujh ko alag bula ke kaha

aaj ki zindagi ka naam hai khauf

khauf hi vo zamin hai jis men

firqe ugte hain firqe palte hain

dhare sagar se kat ke chalte hain

khauf jab tak dilon men baaqi hai

sirf chehra badalte rahna hai

sirf lahja badalte rahna hai

koi mujh ko mita nahin sakta

jashn-e-adam mana nahin sakta