Fakhr Abbas
ghazlen likh likh pagal hone vaala huun
jhuuT nahin ab sach men rone vaala huun
baten karna phone pe jaan ab chhoḌo bhi
ḳhvab men aao main bhi sone vaala huun
haath pakaḌ kar rok lo meri jaan mujhe
phir duniya ki bhiiḌ men khone vaala huun
aur na maila kar duun us ke daman ko
daagh jo us ke dil se dhone vaala huun
us ko kis ummid pe apna bol diya
main to aur kisi ka hone vaala huun
gali gali bahlata phirta bachchon ko
tum samjho ik shaḳhs khilaune vaala huun
kaghaz ke ye phuul mahakte thoḌi hain
main lafzon ke haar pirone vaala huun
Leave a Reply