ḳhun-e-dil mujh se tira rang-e-hina mange hai
ya hatheli pe koi naqsh-e-vafa mange hai
jo sada deta raha dar-o-rasan tohfe men
ham faqiron se vahi harf-e-dua mange hai
kya hua hai ki rifaqat ka bharam rakhne ko
mujh se mahbub mira zaḳhm naya mange hai
shahar men dhansta hai fitne ki na.i daldal men
kya qayamat hai ki mera hi pata mange hai
kuchh samajh men nahin aata hai mizaj-e-yaran
jis ko dekho vahi iz.har-e-vafa mange hai
vo to vahshat men kabhi samjhe hai mujh ko qatil
aur kabhi kucha-e-qatil ka pata mange hai
aql par parda paḌa hai ki suḳhnavar ‘anjum’
din ke mahaul men bhi kaali rida mange hai
Leave a Reply