Kaif Bhopali
is tarah mohabbat men dil pe hukmarani hai
dil nahin mira goya un ki rajdhani hai
ghaas ke gharaunde se zor-azma.i kya
andhiyan bhi pagli hain barq bhi divani hai
shayad un ke daman ne ponchh diin miri ankhen
aaj mere ashkon ka rang zafrani hai
puchhte ho kya baaba kya hua dil-e-zinda
vo mira dil-e-zinda aaj an-jahani hai
‘kaif’ tujh ko duniya ne kya se kya bana Daala
yaar ab tire munh par rang hai na paani hai
Leave a Reply