Waliullah Wali
na dekhen kamtari ab kamtaron ki
isi men behtari hai behtaron ki
karo tum laakh ara.ish gharon ki
zarurat kam na hogi maqbaron ki
yahan thak jaa.e na neza tumhara
miri basti hai basti ḳhud-suron ki
siyasat ne paḌha rahzan ka kalma
baḌi zillat hui hai rahbaron ki
chaman ko ye naya mausam mubarak
uḌegi faḳhta ab be-paron ki
ḳhuda rakkhe dil-e-iza-talab ko
zaban chalti rahegi nashtaron ki
ḳhusha qatil ki shan-e-shahr-yari
mana.en ḳhair ham apne saron ki
nazar aata nahin apna gareban
bura.i kar rahe hain dusron ki
‘vali’ ji pir-e-mai-ḳhana bane hain
inayat hai ghazal ke dilbaron ki
Leave a Reply