Mushaf Iqbal Tausifi
bichhaḌ ke bhi mila rusva.iyon ka qahr tujhe
chhupa saka na tire ansuon ka shahr tujhe
ye chaḌhti dhuup ka malbus utaar de sar-e-sham
utarti dhuup men ab dekhta hai shahr tujhe
har ek sail-e-sada ko tu kar gaya payab
Dubo saki na miri chahaton ki nahr tujhe
bikharti kirnon ko angan men thamne vaale
mah-e-tamam ka piina paḌega zahr tujhe
tu chhoḌ aaya jise Dubte jazire men
dikha.i dega vahi chehra lahr lahr tujhe
badan ko toḌ ke bahar nikal bhi aa kisi shab
hisar-e-jism men jiine na dega dahr tujhe
‘musavvir’ us ka mudava bhi tu ne kuchh socha
vo rog jo liye phirta hai shahr shahr tujhe
Leave a Reply