ahmad-shahryar

Kun-Fayakun Ka Hasil Yani Mitti Aag Hawa Aur Pani

kun-fayakun ka hasil yaani mitti aag hava aur paani

pal men baqa ka pal men faani mitti aag hava aur paani

nagri nagri phirti hain ye divaren bhi saath hi mere

karte hain meri nigrani mitti aag hava aur paani

khak-basar huun shola-ba-jan huun ah-kunan huun ashk-fishan huun

dekh tu apni karistani mitti aag hava aur paani

mera kya hai mar jaunga charon or bikhar jaunga

aap kahan jaenge jaani mitti aag hava aur paani

main kabhi shoala huun kabhi shabnam gaahe zakhm to gaahe marham

karte hain mujh men khincha-tani mitti aag hava aur paani

main aina dekh raha huun lekin ye kya dekh raha hai

mera aks pas-e-hairani mitti aag hava aur paani

ishq ki nisbat se hain zinda sahra suraj badal dariya

ishq nahin to sab be-maani mitti aag hava aur paani

More Poems

Leave a Comment