sun leve agar tu miri dildar ki avaz
hargiz na sune phir kabhun mizmar ki avaz
khul javen agar kaan tire dil ke to be-shak
har samt se phir aae tujhe yaar ki avaz
sun kar vo sada tair-e-dil ki mire bole
shayad ki ye hai bulbul-e-gulzar ki avaz
ho jaave kaman tir-e-falak bar-e-alam se
sun leve jo tere lab-e-sofar ki avaz
murde ko jila kar ke banave hai masiha
ai isa-e-dauran tiri raftar ki avaz
sunta huun main ‘asim’ shah-e-khadim ke labon se
har lahza badal shibli aur attar ki avaz
Leave a Reply