Poet
hai nau-javani men zo.af-e-piri badan men ra.asha kamar men ḳham hai
zamin pe saaya hai apne qad ka ki jada-e-manzil-e-adam hai
yahi hai rasm-e-jahan-e-fani isi men kaTti hai zindagani
kabhi hai saman-e-aish-o-rahat kabhi hujum-e-gham-o-alam hai
batao kyuun chup ho munh se bolo guhar-fishan ho dahan to kholo
aziiz rakhte ho jis ko dil se usi ke sar ki tumhen qasam hai
haTao a.ine ko ḳhudara labon pe aaya hai dam hamara
banav tum dekhte ho apna yahan hai dhaḌka ki raat kam hai
tumhare kuche men jab se baiThe bhula.e dil se sabhi tariqe
ḳhuda hi shahid jo jante hon kahan kalisa kahan haram hai
abas hai koshish husul-e-zar men ḳhayal-e-fasid ko rakh na sar men
vahi milega azal se jo kuchh har ek ke naam par raqam hai
farishte jannat ko le chale the pa tere kuche men ham jo pahunche
machal ga.e un se kah ke chhoḌo hamen yahi gulshan-e-iram hai
juda ho jab yaar apna saaqi kahan ki sohbat sharab kaisi
pila.en gar ḳhizr ab-e-haivan ham us ko samjhen yahi ki sam hai
jila.e ya ham ko koi maare bahisht de ya saqar men Daale
rahega us but ka naam lab par hamare jab tak ki dam men dam hai
‘habib’ ta-chand fikr-e-daulat kabhi to kar dil se shukr-e-ne.amat
karim ko hai karam ki aadat magar ye ghaflat tiri sitam hai
Leave a Reply