Wali Alam Shaheen
ḳhak-e-dil kahkashan se milti hai
ye zamin asman se milti hai
haath aati nahin kabhi duniya
aur kabhi har dukan se milti hai
ham ko aksar gunah ki taufiq
hujjat-e-qudsiyan se milti hai
dil ko iman janne vaale
daulat-e-dil kahan se milti hai
mavara-e-suḳhan hai jo tauqir
ik kaḌe imtihan se milti hai
intiha ye ki meri hadd-e-safar
manzil-e-gumrahan se milti hai
har sitara lahuluhan mira
ye jabin asman se milti hai
kunj-e-gul ki ḳhabar dariche ko
ab to bad-e-ḳhizan se milti hai
sahl ‘shahin’ ye hunar to nahin
sha.iri naqd-e-jan se milti hai
Leave a Reply