yaad aate ho kis saliqe se
jaise barish ho vaqfe vaqfe se
yaad koi rahi ho vabasta
jaise har rut ke ḳhaas lamhe se
jaise ye bhi ho husn ka andaz
baat karna magar taqaze se
mausam-e-gul ko koi batla do
dil bhi khilta hai phuul khilne se
raat ka apna husn hota hai
raat ko dekh din ke shishe se
mere siine men rakh gaya har dard
mera hamdard kis qarine se
ik shahadat hai raah men marna
maut hai lauT jaana raste se
lutf unchi uḌaan men kya hai
puchh lena kisi parinde se
har muḳhalif hai vajib-ul-qatl aaj
tere islam ke havale se
kar-farma hai kya pas-e-alfaz
kitna vazeh hai tere lahje se
kaun si baat ho ga.i aisi
yaar uThne lage hain chupke se
dekh raftar-e-zindagi ‘ruhi’
ruk ga.i gaaḌi ek jhaTke se
Leave a Reply