kya ḳhabar thi atishin ab-o-hava ho ja.unga
ḳhaak o ḳhuun ka mustaqil main silsila ho ja.unga
ibtida huun ap-apni intiha ho ja.unga
barishon ka qurb pa kar phir hara ho ja.unga
jhaḌiyon ki ungliyan lapkengi gardan ki taraf
pahli shab ke aḳhiri pal ki dua ho ja.unga
asman ki samt uTThenge bagule aur main
rafta rafta ik maqam-e-gum-shuda ho ja.unga
chilchilati dhuup men apna sarapa dekh kar
raat ki tanha.iyon ka vasvasa ho ja.unga
kuchh na kuchh khota chala ja.unga ik ik moḌ par
aur phir main ek din tera kaha ho ja.unga
khurdure aur khokhle bargad ka baazu thaam kar
sub.h-e-simin ka ma.al-e-tai-shuda ho ja.unga
jab koi jhukne lagega shaam ki dahliz par
gumbad-e-mauhum ka main mubtana ho ja.unga
phaḌ.phaḌate dekh kar taron men kaftar ko ‘nizam’
ungliyon ki uljhanon men mubtala ho ja.unga
Leave a Reply