bikegi us ki hi dastar tai hai
ki jis ki qimat-e-kirdar tai hai
hua tha hadisa kuchh aur lekin
likhega aur kuchh aḳhbar tai hai
baḌe angan pe itrao na itna
uThegi us men bhi divar tai hai
hai nala.eq magar sardar ka hai
banega beTa hi sardar tai hai
hai munsif hi giraftar-e-ta.assub
adalat men hamari haar tai hai
na le ja ham ko us mahfil men ai dil
jahan hona zalil-o-ḳhvar tai hai
hunar hai aise rishton ko nibhana
jahan har baat par takrar tai hai
sada sach bolte ho tum bhi ‘azam’
tumhare vaste bhi daar tai hai
Leave a Reply