dam bhar ki ḳhushi ba.is-e-azar bhi hogi
is raah men saaya hai to divar bhi hogi
sadiyon se jahan jis ke ta.aqub men ravan hai
vo sa.at-e-sad-rang giraftar bhi hogi
rangon ki rida oḌh ke is reg-e-ravan par
utri hai jo shab vo shab-e-didar bhi hogi
kahta hai mire kaan men ḳhushbu ka payami
munh-band kali ma.el-e-guftar bhi hogi
saa.e se lipaT ja.enge qadmon se ba-har-gam
rusva.i kuchh apni sar-e-bazar bhi hogi
ai shab na kaTegi tire siine ki syahi
ik shoḳh kiran muft gunahgar bhi hogi
sunte hain ki har sub.h ke hathon men ‘rashid’ ab
ik zahr men Duubi hui talvar bhi hogi
Leave a Reply