Suhail Kakorvi
barson hue us se na koi baat hui raat
tu ne bhi na ki apni koi jadugari raat
gum ho ga.i ummid-e-mulaqat sahar men
ye tu ne mire saath ajab chaal chali raat
vo le gaya saath apne ujale mire dil ke
kaaTe na kaTi ham se jo thi dard-bhari raat
ashkon se kaha main ne juda.i ka fasana
is par ye kaha us ne ki aa.egi na.i raat
shikve mire aur us ka batana ise ilzam
kuchh tai na hua aur yunhi biit ga.i raat
jo mere tasavvur men tha hangama-e-mahshar
us ke liye maḳhsus hui vasl ki hi raat
is men hi to hai chand sitaron ka muqaddar
ik ḳhal-e-siyah-tab ki hai jalvagari raat
jis raat kabhi koi mere saath raha tha
aa jaa.e ‘suhail’ aaj dua hai ki vahi raat
Leave a Reply