Gardish-e-Jam Nahin Gardish-e-Ayyam To Hai

Ahmad Rahi

gardish-e-jam nahin gardish-e-ayyam to hai

sai-e-nakam sahi phir bhi koi kaam to hai

dil ki betabi ka akhir kahin anjam to hai

meri qismat men nahin dahr men aram to hai

mail-e-lutf-o-karam husn-e-dil-aram to hai

meri khatir na sahi koi sar-e-bam to hai

tu nahin mera masiha mira qatil hi sahi

mujh se vabasta kisi taur tira naam to hai

halqa-e-mauj men ik aur safina aaya

sahil-e-bahr pe kohram ka hangam to hai

tang-dasto tahi-damano karo shukr-e-khuda

mai-e-gulfam nahin hai shafaq-e-sham to hai