Main Agar siDhiyan Utar Jati

maiñ agar sīḌhiyāñ utar jaatī

is kā matlab hai maiñ to mar jaatī

maiñ agar shaam kī havā hotī

roz hī chāñdnī ke ghar jaatī

tum agar ham-safar nahīñ hote

merī himmat kahīñ bikhar jaatī

vo agar mujh ko sāñtvnā detā

merī āvāz aur bhar jaatī

dekh rakkhī thī maut kī sūrat

aa.ina dekhtī to Dar jaatī

maiñ agar sochtī tumhārī tarah

maiñ bhī har baat se mukar jaatī

Leave a Comment