Poet
pareshan haal daman dhajjiyan surat faqirana
ye tera talib-e-nashad hai ya koi divana
na ho kuchh aur to itni hi nisbat tujh se ho jaa.e
jidhar ja.un zamana mujh ko samjhe tera divana
koi to baat hai jo sham.a ke aansu nahin thamte
abhi kya kahte kahte ho gaya ḳhamosh parvana
hazaron hasraten abad hain lakhon tamanna.en
isi dil men ba-zahir jo nazar aata hai virana
pila de mai-kada-bar-dosh ankhon se mujhe saaqi
uTha le mere aage se ye shisha aur paimana
miri rudad-e-gham ki allah allah ye hama-giri
samajhta hai use har sunne vaala apna afsana
mohabbat ki na ho gar kar-farma.i to duniya men
hujum-e-bulbul-o-gul ho na bazm-e-sham-o-parvana
janab-e-naseh-e-mushfiq hain kuchh kho.e hue ‘talib’
kisi kafir ko shayad dekh aa.e be-hijabana
Leave a Reply