Poet
dil men tir-e-ishq hai aur farq par shamshir-e-ishq
kya bataen pad gai hai paanv men zanjir-e-ishq
dekhne vaale ye kahte hain kitab-e-dahr men
tu sarapa husn ka naqsha hai main tasvir-e-ishq
kohkan aur qais mil jaaen to main un se kahun
le gae kya saath hi qabron men tum tasir-e-ishq
vah-re insaf itna bhi na vaan puchha gaya
ye qusur-e-husn hai ya asl men tasir-e-ishq
baat karne se bhi nafrat ho gai dildar ko
vah-re izhar-e-ulfat vah-re tasir-e-ishq
kya sabab kya vajh kyuun aa kar nikal jaae shikar
kyuun nishana par na jaega hamara tir-e-ishq
pahle apna sar qalam karvae phir tayyar ho
har kisi ka kaam hai jo likh sake tafsir-e-ishq
daulat-e-didar hasb-e-muddaa hasil hui
mil gai jis shakhs ko taqdir se iksir-e-ishq
husn-e-janan ki kashish duniya men baaqi rah gai
bad-nasibi se hamari ud gai tasir-e-ishq
tu bhi gul ke aine par khinch de tasvir-e-husn
main bhi bulbul ko sunaun baagh men taqrir-e-ishq
kya shikayat us ki ‘parvin’ ye to hoti aai hai
pahle ulfat ki thi izzat aur na ab tauqir-e-ishq
Leave a Reply