na ansuon men kabhi tha na dil ki aah men hai
tamash-bin hamesha se raqs-gah men hai
ba-nam-e-ishq miri zindagi tire qurban
magar nasib mira be-talab nibah men hai
main janta huun ki hai kis ki aankh ka aansu
vo ek la.al jo ab tak miri kulah men hai
dilon ke rishte hain sab alvida’i manzil men
ki na-guzir aziyyat har ek chaah men hai
namaz-e-id ka.i saal se na paḌh paaya
ba-nam-e-maut koi ḳhauf eid-gah men hai
ye meri fikr na.e daur ki amanat hai
ki aane vaali sadi bhi miri nigah men hai
ye ittifaq bhi ik inhiraf hai goya
mira ‘zamir’ abhi tak miri panah men hai
Leave a Reply