Seemab Akbarabadi
shayad jagah nasib ho us gul ke haar men
main phuul ban ke a.unga ab ki bahar men
kafna.e baghban mujhe phulon ke haar men
kuchh to bura ho dil mira ab ki bahar men
gundhva ke dil ko laa.e hain phulon ke haar men
ye haar un ko nazr karenge bahar men
nichla raha na soz-e-darun intizar men
is aag ne surang laga di mazar men
ḳhalvat ḳhayal-e-yar se hai intizar men
aa.en farishte le ke ijazat mazar men
ham ko to jagna hai tire intizar men
aa.i ho jis ko niind vo so.e mazar men
main dil ki qadr kyuun na karun hijr-e-yar men
un ki si shoḳhiyan hain isi be-qarar men
‘simab’ be-taḌap si taḌap hijr-e-yar men
kya bijliyan bhari hain dil-e-be-qarar men
thi tab-e-husn shoḳhi-e-tasvir-e-yar men
bijli chamak ga.i nazar-e-be-qarar men
badal ki ye garaj nahin abr-e-bahar men
barra raha hai koi sharabi ḳhumar men
umr-e-daraz maang ke laa.i thi chaar din
do aarzu men kaT ga.e do intizar men
tanha mire satane ko rah jaa.e kyuun zamin
ai asman tu bhi utar aa mazar men
ḳhud husn na-ḳhuda-e-mohabbat ḳhuda-e-dil
kya kya liye hain main ne tire naam pyaar men
mujh ko miTa ga.i ravish-e-sharmgin tiri
men jazb ho gaya nigah-e-sharmsar men
allah-re sham-e-gham miri be-iḳhtiyariyan
ik dil hai paas vo bhi nahin iḳhtiyar men
ai ashk-e-garm maand na paḌ jaa.e raushni
phir tel ho chuka hai dil-e-dagh-dar men
ye mo.ajiza hai vahshat-e-uryan-pasand ka
main ku-e-yar men huun kafan hai mazar men
ai dard dil ko chheḌ ke phir baar baar chheḌ
hai chheḌ ka maza ḳhalish-e-bar-bar men
ifrat-e-ma.asiyat se fazilat mili mujhe
main huun gunahgaron ki pahli qatar men
Darta huun ye taḌap ke lahad ko ulaT na de
hathon se dil daba.e hue huun mazar men
tum ne to haath jaur-o-sitam se uTha liya
ab kya maza raha sitam-e-rozgar men
kya jaane rahmaton ne liya kis tarah hisab
do chaar bhi gunah na nikle shumar men
o parda-dar ab to nikal aa ki hashr hai
duniya khaḌi hui hai tire intizar men
roi hai saari raat andhere men be-kasi
aansu bhare hue hain charagh-e-mazar men
‘simab’ phuul ugen lahad-e-andalib se
itni to zindagi ho hava-e-bahar men
Leave a Reply