tum mujhe bhi kanch ki poshak pahnane lage
main jise dekhun vahi patthar nazar aane lage
be-sabab ghar se nikal kar aa ga.e bazar men
aa.ina dekha nahin tasvir chhapvane lage
dasht men pahunche to tanha.i mukammal ho ga.i
baḌh ga.i vahshat to phir ḳhud se hi Takrane lage
ḳhuun ka nashsha chaḌha to jism zahrila hua
ḳhvahishon ke paniyon men saanp lahrane lage
kuchh nahin hai zehn men to vahm ki shaklen bana
raushni hogi agar saa.e nazar aane lage
dekhna chaha to vo ankhon se ojhal ho gaya
chumna chaha to mere honT pathrane lage
rang aḳhir le hi aaya meri sochon ka jumud
barf ke suraj bala ki dhuup phailane lage
chal paḌe to ho liye ‘iqbal-sajid’ apne saath
thak ga.e to apne hi saa.e hain sustane lage
Leave a Reply