Kisi Se Khush Hai Kisi Se Khafa Khafa Sa Hai

kisi se ḳhush hai kisi se ḳhafa ḳhafa sa hai

vo shahr men abhi shayad naya naya sa hai

na jaane kitne badan vo pahan ke leta hai

bahut qarib hai phir bhi chhupa chhupa sa hai

sulagta shahr nadi ḳhuun kab ki baten hain

kahin kahin se ye qissa suna suna sa hai

saron ke siing to jangal ki den hote hain

vo aadmi to hai lekin Dara Dara sa hai

kuchh aur dhuup to ho os suukh jaane tak

vo ped ab ke baras bhi hara hara sa hai

Leave a Comment