gardish-e-mai ka is par na hoga asar mast ankhon ka jaadu jise yaad hai
vo nasim-e-gulistan se bahlega kya tere anchal ki ḳhushbu jise yaad hai
tishnagi ki vo shiddat ko bhulega kya dhuup ki vo tamazat ko bhulega kya
teri be-faiz ankhen jise yaad hain tera be-saya gesu jise yaad hai
koi mumtaz hai aur na shah-e-jahan soz aur saaz hai kuchh alag hi yahan
taj-mahalon ke vo ḳhvab dekhega kya sang-e-marmar ka zaanu jise yaad hai
us ko dukh-dard koi chhalega nahin us ki duniya ka suraj Dhalega nahin
tere bachpan ki ḳhushiyan jise yaad hain tere daman ka jugnu jise yaad hai
ai ‘alim’ afaton ke ye lashkar hain kya ek mahshar nahin laakh mahshar hain kya
us ko fitnon ki parvah bilkul nahin tira ik ek ghunghru jise yaad hai
Leave a Reply