Jo Ye Kahte the Ki Mar Jaana Hai

Navneet Sharma

jo ye kahte the ki mar jaana hai

un se jiine ka hunar jaana hai

kis ne socha tha ki ḳhud se mil kar

apni avaz se Dar jaana hai

hadisa maut nahin insan ki

hadisa ḳhvab ka mar jaana hai

hazrat-e-dil ko manana hoga

aaj phir us ki Dagar jaana hai

kuchh hava, aag, zamin, aab, falak

phir mujhe lauT ke ghar jaana hai

ek balisht nahin jis ki chhanv

tum ne us ko bhi shajar jaana hai

saath rakh mujh ko baḌha le qimat

go mujhe tu ne sifar jaana hai

aaj phir tum ko nahin DhunDh saka

dil ko sahra men pasar jaana hai

aap bhi suniye kaha hai dil ne

”aaj har had se guzar jaana hai”

silsila toḌ rahe ho kyunkar

silsila ḳhud hi bikhar jaana hai

yaad ki ghaas to giili hai bahut

ab dhuan dil pe pasar jaana hai

dil ko sairab kiya ashkon se

ham ne rone ka hunar jaana hai

apna jo bhi tha vo sab chhuT gaya

ye magar vaqt-e-safar jaana hai