har ek lafz men siine ka nuur Dhaal ke rakh
kabhi-kabhar to kaghaz pe dil nikal ke rakh
jo doston ki mohabbat se ji nahin bharta
to astin men do-char saanp paal ke rakh
tujhe to kitni baharen salam bhejengi
abhi ye phuul sa chehra zara sambhal ke rakh
yahan se dhuup ke neze buland hote hain
tamam chhanv ke qisson pe ḳhaak Daal ke rakh
mahak rahe hain ka.i asman miTTi men
qadam zamin-e-mohabbat pe dekh-bhal ke rakh
dil-o-dimagh Thikane pe aane vaale hain
ab us ka zikr kisi aur din pe Taal ke rakh
Leave a Reply