Nazeer Banarasi
tum nain ke donon paT mere liye va rakhna
main jald hi lauTunga darvaza khula rakhna
jo kahna ho kah Daalo ho ja.ega ji halka
jo baat hai kahne ki dil men use kya rakhna
hai zinda-dili daulat sab ḳharch na kar dena
shayad kabhi kaam aa.e thoḌi si bacha rakhna
halki si kami karna kal kamre ki zinat men
tasvir haTa dena aa.ina laga rakhna
saman-e-safar pyare kya saath na luun kya luun
ik shab ka musafir huun kya chhoḌna kya rakhna
qiston men ‘nazir’ un se hal-e-gham-e-dil kahna
kuchh aaj suna dena kuchh kal pe uTha rakhna
Leave a Reply