jalvon se na aankh jhapakti hai jalvon ko na aankh tarasti hai
ham ne vo piyala pi hi liya jis men na ḳhumar na masti hai
kuchh lamhe hain jin lamhon men ehsas use chhu leta hai
aalam se udhar jo aalam hai hasti se udhar jo hasti hai
hai ruuh ki halat kundan ki jitna hi tapegi nikhregi
gham ek kasauTi hai jis par ye fitrat ham ko kasti hai
hikmat ki bhi kheti gharq hui hairat ka bhi sahra Duub chala
ghanghor ghaTa hai yaad un ki kya TuuT ke dil pe barasti hai
har sair men thi ik baat magar kya ab ke safar ki baat kahen
ham us basti men ja nikle hasti se pare jo basti hai
is dil se ho kar dil se udhar ik basti hai jis basti men
har jins ki nayabi hai magar ik jins-e-tamasha sasti hai
Leave a Reply