Afzal Minhas
main apne dil men nai khvahishen sajae hue
khada hua huun hava men qadam jamae hue
nae jahan ki tamanna men ghar se nikla huun
hatheliyon pe nai mishalen jalae hue
hava ke phuul mahakne lage mujhe pa kar
main pahli baar hansa zakhm ko chhupae hue
na andhiyan hain na tufan na khuun ke sailab
hain khushbuon men manazir sabhi nahae hue
pighal gai hain achanak ghamon ki zanjiren
gire hain dhuup ke neze badan churae hue
dikha rahi hai nai zindagi ke naqsh-e-qadam
sukun ki niind gale se mujhe lagae hue
chatakhne vaali zamin duur rah gai ‘afzal’
hain saare khet sitaron ke lahlahae hue
Leave a Reply