Nasira Zuberi
raat bhar TuuTe hue ḳhvab ke azar ke saath
kaun rota hai miri aankh ki divar ke saath
kis ne bandha hai mire gird hisar-e-gardish
da.era kaun banata hai ye parkar ke saath
sar kaTa de ki jhuka de koi kamzor vahan
saath dene ko jo puchhe koi talvar ke saath
ḳhud-kushi qatl-gari hadisa dahshat-gardi
roz ik sog chala aata hai aḳhbar ke saath
muskurata hua ye dushman-e-derina mira
aaj maidan men aaya hai na.e vaar ke saath
Leave a Reply