Un Se Kah Do Ki Ilaj-E-Dil-E-Shaida Na Karen

Bismil Allahabadi

un se kah do ki ilaj-e-dil-e-shaida na karen

yahi achchha hai ki bimar ko achchha na karen

kya kaha phir to kaho ham koi shikva na karen

chup rahen zulm sahen zulm ka charcha na karen

ye tamasha to karen ruḳh se uTha den vo naqab

ek aalam ko magar mahv-e-tamasha na karen

vaqt-e-aḳhir to nikal jaa.e tamanna meri

vo na aise men bhi aa.en kahin aisa na karen

intiha ho ga.i azad-dahi ki sayyad

ham tasavvur men bhi gulzar ko dekha na karen

roz vo kahte hain aaj a.enge kal a.enge

aise va.ade se to behtar hai ki va.ada na karen

ḳhud-numa.i unhen ghairon men liye phirti hai

ham to jab janen ki ham se bhi vo parda na karen

tegh ruk jaati hai navak bhi bahak jaata hai

koi ‘bismil’ ko ye samjha de ki taḌpa na karen