aap aur aap ka asar donon
kar ga.e ham ko dar-ba-dar donon
donon tanha.iyon ke maare the
is liye bhi hain ham-safar donon
ek bistar hai beach men takiya
kaise so.enge raat bhar donon
baat baḌhne ki ye vajah bhi thi
baat karte the muḳhtasar donon
aap aa.e bhi aur chale bhi ga.e
jhuTh lagti hain ye ḳhabar donon
ishq se log be-ḳhabar rahte
saath marte nahin agar donon
ek bachchi gharib aur an-paḌh
is pari ke nahin hain par donon
do guni kar rahe the ḳhushiyon ko
ek duuje ko baanT kar donon
kaise munh ko phula.e baiThe hain
ek-duje ki baat par donon
band karte hi aankh aane lage
ek-duje ko ab nazar donon
Leave a Reply