ghanghor ghata ke anchal ko jab kaali raat nichod gai
ik tanhai ko chain mila ik tanhai dam tod gai
ai vaqt ke andhe rakhvalo ye raaz to ham bhi jante hain
be-vajh tumhari ankhon se kyuun binai munh mod gai
ik vo bhi safina tha apna jo sahil sahil ghuum gaya
ik ye bhi hamari kashti hai jo lahron men sar phod gai
har chand nazar ne taron par shab-khun to maara hai lekin
ye raat sahar ke daman par kuchh daagh lahu ke chhod gai
insan ka raushan mustaqbil jis vaqt charagh-e-rah bana
har manzil apne qadmon se tarikh ka naata jod gai
Leave a Reply