saare mausam hain mehrban se kuchh
roz utarta hai asman se kuchh
har ibarat saval jaisi hai
lafz gha.eb hain darmiyan se kuchh
kis ki lau ne jala diya kis ko
raakh men hain abhi nishan se kuchh
kis se tafsir-e-mah-o-sal karen
din guzarte hain be-aman se kuchh
kya ḳhabar ye kahan talak phaile
uTh raha hai dhuan guman se kuchh
karvan kis ka manzilen kis ki
kya jhalakta hai dastan se kuchh
ek tasvir raushni le kar
saa.e nikle to hain makan se kuchh
is qadar e’tibar kar liije
rabt rakhta huun ḳhandan se kuchh
tum bhi us vaqt se Daro logo
jab nikal jaa.e is zaban se kuchh
Leave a Reply