Mujhe Ye Rasta Pahchanta Hai

mujhe ye rāsta pahchāntā hai

ki har zarre se merā rābta hai

darīcha aap khul jaatā hai koī

kisī khiḌkī se maazī jhāñktā hai

ḳhudā merā mujhe yuuñ baḳhsh degā

mirī majbūriyāñ vo jāntā hai

kharā sonā samajhtā hogā mujh ko

mujhe jo aag meñ vo Dāltā hai

use lagte haiñ saare log baune

vo apne qad se sab ko nāptā hai

vo bolā to qayāmat hogī barpā

vo insāñ jo sabhī kuchh jāntā hai

ta.alluq hī nahīñ ‘tāsīr’ agar kuchh

mujhe dushman vo kyoñ gardāntā hai

Leave a Comment