mujhe ye rasta pahchanta hai
ki har zarre se mera rabta hai
daricha aap khul jaata hai koi
kisi khiḌki se maazi jhankta hai
ḳhuda mera mujhe yuun baḳhsh dega
miri majburiyan vo janta hai
khara sona samajhta hoga mujh ko
mujhe jo aag men vo Dalta hai
use lagte hain saare log baune
vo apne qad se sab ko napta hai
vo bola to qayamat hogi barpa
vo insan jo sabhi kuchh janta hai
ta.alluq hi nahin ‘tasir’ agar kuchh
mujhe dushman vo kyon gardanta hai
Leave a Reply