donon ham-pesha the donon hi men yarana tha
qatil-e-shahr se par rabt raqibana tha
vo khule jism phira shahr ke bazaron men
log kahte hain ye iqdam dilerana tha
band muTThi men miri raakh thi tabiron ki
us ki ankhon men bhi ik ḳhvab marizana tha
laghzish-e-pa bhi har ik gaam thi saaya saaya
zindagi tujh se ta.alluq bhi sharifana tha
tum jahan apni masafat ke nishan chhoḌ ga.e
vo guzargah miri zaat ka virana tha
sunte hain apni hi talvar use kaaT ga.i
dosto ham men jo ik shaḳhs harifana tha
Leave a Reply