koi ḳhvab hai na ḳhayal hai ye ajiib surat-e-hal hai
vahi vahshat-e-mah-o-sal hai ye ajiib surat-e-hal hai
kabhi sochti huun ki main agar tujhe be-naqab karun magar
zara dosti ka ḳhayal hai ye ajiib surat-e-hal hai
jo dil-o-nazar se to duur hai koi mas.ala to zarur hai
kahan dil ke shishe men baal hai ye ajiib surat-e-hal hai
koi shishagar koi kuza-gar koi zaḳhm de koi charagar
koi tiir hai koi Dhaal hai ye ajiib surat-e-hal hai
tiri be-ruḳhi ka gila kare tire haq men koi dua kare
koi faisla bhi muhal hai ye ajiib surat-e-hal hai
hue munqata.a sabhi rabte kahin gum hue sabhi raste
na safar ka koi ma.aal hai ye ajiib surat-e-hal hai
Leave a Reply