Siya Sachdev
tum ne mahsus kahan meri zarurat ki hai
mere jazbon ki kahan tum ne himayat ki hai
haal puchha na kisi ne mere aansu ponchhe
kya kisi se bhi nahin main ne mohabbat ki hai
ḳhush thi main chhoTe se ghar men bhi tire pyaar ke saath
main ne kab tujh se kisi mahl ki chahat ki hai
sochti huun main yahi baiTh ke tanha.i men
kya yaqin kar ke tira main ne himaqat ki hai
aaj phir shahr men uTThega koi hangama
aaj sach kahne ki ik shaḳhs ne jur.at ki hai
kitna roi huun tire ba.ad tujhe kya ma.alum
main ne lamhon ki ada is tarah qimat ki hai
kis tarah milta ‘siya’ saare zamane se mizaj
baat kuchh aur nahin baat tabi.at ki hai
Leave a Reply