Aarzu Rakhna Mohabbat Mein baDa Mazmum Hai

aarzū rakhnā mohabbat meñ baḌā mazmūm hai

sun ki tark-e-ārzū hī ishq kā mafhūm hai

un nigāhoñ ke tasādum se jo chiñgārī uThe

ishq us kā naam hai ye ishq kā mafhūm hai

ab to ye armān hai armān hī paidā na hoñ

go samajhtā huuñ ki ye ummīd bhī mauhūm hai

vo khaḌe haiñ vo tasavvur ab tujhe maiñ kyā kahūñ

aañkh mahv-e-dīd kar diid se mahrūm hai

ishq phir mahrūmiyāñ nākāmiyāñ barbādiyāñ

merī qismat meñ jo likkhā hai mujhe ma.alūm hai

maiñ tujhī ko dekhtā huuñ jalva-farmā har taraf

mā-sivā tere mire nazdīk sab ma.adūm hai

zindagī ko maut hai jab zindagī ḳhud ho fareb

maut bhī goyā fareb-e-hastī-e-mauhūm hai

ishq meñ ‘tālib’ matā-e-hosh kho kar ḳhush to ho

us kā jo anjām hai vo bhī tumheñ ma.alūm hai

Leave a Comment