Zafar Kaleem
in dinon main ghurbaton ki shaam ke manzar men huun
meri chhat TuuTi paḌi hai dusron ke ghar men huun
aa.ega ik din mire uḌne ka mausam aa.ega
bas isi ummid par main apne bal-o-par men huun
jism ki ra.ana.iyon men DhunDte ho tum mujhe
aur main kab se tumhari ruuh ke paikar men huun
dekhte hain sab nazar aati huiin uncha.iyan
kaun dekhega mujhe buniyad ke patthar men huun
aap kya rokengi iz.har-e-sadaqat se mujhe
aap ko duniya ka Dar hai main ḳhuda ke Dar men huun
ai zamane kal miri Thokar se bachna hai tujhe
ittifaqan aaj vaise main tiri Thokar men huun
maut ban ja.unga teri ai sitamgar dekhna
mujh pe jo ḳhanjar uThega main usi ḳhanjar men huun
nafraton ki ik dahakti aag hai charon taraf
main fasad-e-shahr ke jalte hue manzar men huun
sochta huun ye bhi kaisi bad-nasibi hai ‘zafar’
main bahadur ho ke bhi haare hue lashkar men huun
Leave a Reply