shab dhali mahfil uthi ab ghar chalen
har taraf hai khamushi ab ghar chalen
dhundte ho kya khushi ab ghar chalen
mil chuke hain gham kai ab ghar chalen
dekh kar sahra men khvab-e-gulsitan
thak chuki hai rah-ravi ab ghar chalen
jal utha dil men charagh-e-agahi
raah kuchh raushan hui ab ghar chalen
nakhuda laaya ki laaya hai khuda
naav sahil par lagi ab ghar chalen
koi to ‘bebak’ hogi muntazir
maut ho ya zindagi ab ghar chalen
Leave a Reply