niyyat agar ḳharab hui hai huzur ki
gaḌ.h lo koi kahani hamare qusur ki
kyuun dil ki aag le na ḳhabar duur duur ki
kaundi hai har dimagh men bijli futur ki
har zulm par kiya hai zamane se ehtijaj
kuchh bhi na ban paḌa to mazammat zarur ki
ta.amir ka to vaqt hai taḳhrib ka junun
ab bhi hai aadmi ko zarurat shu.ur ki
ai sham-e-gham ki gahri ḳhamoshi tujhe salam
kanon men ek aa.i hai avaz duur ki
hosh uḌ ga.e to hosh haqiqat ka aa gaya
muusa ki be-hisi men tajalli thi nuur ki
kahta hai inqalab zamana jise ‘falak’
ik duniya muntazir hai usi ke zuhur ki
Leave a Reply