Nazim Naqvi
main tang-dasti-e-mohlat se itna chahta huun
ḳhud apne aap se ek baar milna chahta huun
siva bharam kahin kuchh bhi nahin hai to phir bhi
main thoḌi duur tire saath chalna chahta huun
main ḳhud pe qahr bhi Dha.un hifazaten bhi karun
main is ḳhuda.i sifat ko baratna chahta huun
main chahta huun saharon ke saath saath rahun
main laḌkhaḌa.e bina hi sambhalna chahta huun
saval phir se hai kirdar ko badalne ka
main ab ki baar bhi kapḌe badalna chahta huun
har ek show se mohabbat hai is liye mujh ko
main nafraton ke tasavvur se bachna chahta huun
Leave a Reply