Ab Marna Hai Apne Khushi Hai Jine Se Be-Zari Hai

ab marna hai apne khushi hai jiine se be-zari hai

ishq men aise halke hue hain jaan badan ko bhari hai

shikve ki charcha hoti hai chupke hi rahna behtar hai

dil ko jalana dil-sozi hai ye gham-e-duniya gham-khvari hai

kis ka vaada kaun aata hai chain se sota hoga vo

raat bahut aai hai ai dil ab nahaq bedari hai

daav tha apna jab vo ham se chaupad sikhne aate the

ab kuchh chaal nahin ban aati jiit ke baazi haari hai

lutte dekha ghash men dekha marte bhi dekha us ne mujhe

itna na puchha kaun hai ye is shakhs ko kya bimari hai

hijr sitam hai kulfat-o-gham hai kis se kahiye haal apna

din ko pade rahna munh Dhanke raat ko girya-o-zari hai

uttho kapde badlo chalo kya baithe ho ‘bahr’ udaas udaas

sair ke din hain phuul khile hain josh pe fasl-e-bahari hai

Leave a Comment