jaam to jaam mai-e-hosh-ruba bhi badli
saath hi rindon ke piine ki ada bhi badli
fasl-e-gul badli saba badli faza bhi badli
aap badle to gulistan ki hava bhi badli
TuuT jaega yaqinan dil-e-mai-ḳhvar agar
nigah-e-saqi-e-mai-ḳhana zara bhi badli
bazm-e-yaran men sada se mujhe pahchanta kaun
mere halat jo badle to sada bhi badli
aaj tak us ne to va.ada koi iifa na kiya
jaane kya soch ke phir shart-e-vafa bhi badli
hone lagta hai kuchh ehsas shikast-e-tauba
bada-ḳhane pe agar chhai zara bhi badli
vaqt ke saath badal jaati hai har shai ‘ajiz’
aap to badle magar ḳhu-e-jafa bhi badli
Leave a Reply