soz-e-gham-e-firaq se dil ko bacha.e kaun
zalim tiri laga.i hui ko bujha.e kaun
miTTi mariz-e-gham ki Thikane laga.e kaun
duniya to un ke saath hai mayyat uTha.e kaun
tevar chaḌha ke puchh rahe hain vo hal-e-dil
rudad-e-gham to yaad hai lekin suna.e kaun
ham aaj kah rahe hain yahan dastan-e-qais
kal dekhiye hamara fasana suna.e kaun
ai naḳhuda ḳhuda pe mujhe chhoḌ kar to dekh
sahil pe kaun ja ke lage Duub jaa.e kaun
rusva karegi dekh ke duniya mujhe ‘qamar’
is chandni men un ko bulane ko jaa.e kaun
Leave a Reply