Shah Naseer
zulf chhuTti tire ruḳh par to dil apna phirta
ghar ko be-sham nahin sub.h ka bhula phirta
dekhne ko jo mira tu na tamasha phirta
to main juun sho.ala-e-javvala na chalta-phirta
kab jafaon se tiri dil hai hamara phirta
shak agar tujh ko hai zalim to dobara phirta
baḳht-e-bargashta-e-majnun abhi sidhe ho jaa.en
dasht men aa.e agar naqa-e-laila phirta
gardish-e-charḳh se sar kyuun na mah-o-ḳhur ka phire
ki shab o roz ye rahta hai hinDola phirta
jins-e-dil ka tiri us zulf se phirna ma.alum
ho ke ḳhat-kash jo bike vo nahin sauda phirta
ḳhal-e-ruḳhsar-e-butan ka nahin bharta ye ḳhayal
kishvar-e-dil men hamare hai kanhayya phirta
dil ki qismat men azal se thi likhi tishna-labi
kyuun na us chah-e-zaqan se ye piyasa phirta
sharm se daman-e-sahil men chhupi hai har mauj
tu jo aThkheliyon se hai lab-e-dariya phirta
dard-e-dil ishq ki chausar men na kaTti hargiz
gar kabhi jiit ka apni koi paasa phirta
aaj piiri men bhi apne na phire baḳht-e-siyah
ki daraḳhton ka bhi din Dhalte hi saaya phirta
TuuT jaati jo kabhi aas tire milne ki
to na laTTu ki tarah dil ye hamara phirta
ba.is-e-jumbish-e-insan hai to ai tar-e-nafas
varna ye baiTh ke uThta na ye chalta-phirta
sair-e-sahra-e-junun-ḳhez ka arman na raha
tere hathon se main kya abla-e-pa phirta
tu ne har kaam pe ki chasm-numa.i varna
main bagule ki tarah ḳhaak uḌata phirta
apne girye ki dikhata main tujhe tughyani
gar shab-e-vasl mire paas na tu aa phirta
anjum-e-charḳh bhi ban jaate hain manind-e-habab
maah ka surat-e-girdab hai baala phirta
likh ‘nasir’ ek ghazal aur badal kar ke radif
tausan-e-ḳhama hai ab dekh to kaisa phirta
Leave a Reply